Riorganizim i thellë në Policinë e Shtetit: Hita bën rreth 70 ndryshime brenda një muaji

Në një muaj që nga marrja e detyrës si drejtues i Policisë së Shtetit, Skënder Hita ka inicuar afër 70 ndryshime në poste kyçe brenda strukturës që numëron rreth 12 mijë efektivë. Që nga takimet e para me drejtuesit vendorë, ai ka vendosur standarde të qarta: mungesa e rezultateve nuk do të tolerohet dhe do të ketë pasoja për ata që nuk përmbushin detyrat.

Sipas shqiptarja, vendimet janë zbatuar në disa faza dhe kanë prekur kryesisht zëvendësdrejtorët e qarqeve të Tiranës, Fierit, Lezhës, Shkodrës e Elbasanit, njësitë e Antiterrorit dhe Operacionale, si dhe drejtoritë e kufirit që funksionojnë të ndara nga qarqet.

Një nga rastet që shpjegojnë arsyet e këtyre ndryshimeve ka ndodhur në Lezhë, ku patrullat e dërguara nga Tirana zbuluan dy ambiente ku zhvilloheshin lojëra të fatit. Ky zbulim çoi në dorëheqjen e drejtorit lokal, Islor Islami. Hita ka ndërhyrë gjithashtu në raste të kufizuara në komisariate, si në Peqin pas zbulimit të një magazine të kthyer në depo droge, dhe në komisariatin nr. 2 të Tiranës.

Në nivelet e larta të Drejtorisë së Përgjithshme, drejtuesit e katër departamenteve do të zgjidhen përmes garës konkurruese, një proces që duhet të hapë vetë Hita. Që nga ndryshimet ligjore të shtatorit 2024 nuk është zhvilluar asnjë konkurs i tillë; një iniciativë e nisur më parë u anulua pas padisë së ish-drejtoreshës së BKH-së, Aida Hajnaj, e cila kërkonte rikthimin në postin që mbante më parë.

Gara pritet të zhbllokohet në qershor, çka mund të sjellë emërime të reja në nivele të larta të Policisë së Shtetit, raporton shqiptarja.