Rriten rastet e falsifikimit të dokumenteve, më shumë të pandehur dhe dënime se një vit më parë

Viti që lamë pas ka shënuar një rritje prej 22,4 % të numrit të procedimeve të regjistruara për falsifikim të dokumenteve në krahasim me vitin 2024.
Të dhënat nga Prokuroria e Përgjithshme, tregojnë një rritje të numrit të procedimeve të dërguara në gjykatë me 31,6 %, rritje të numrit të të pandehurve të regjistruar përkundrejt këtij totali në vitin 2024 prej 34,4 %, rritje të numrit të të pandehurve të dërguar në gjykatë prej 28,7 % dhe rritje të numrit të të pandehurve të dënuar nga gjykata me 41,2 % përkundrejt vitit 2024.

Sa i takon shpërndarjes gjeografike vihet re se numri më i lartë i procedimeve të regjistruara për falsifikimin e dokumenteve është në prokuroritë pranë gjykatave së shkallës së parë Tiranë me 58 % e numrit total të procedimeve, Fier 6 %, Vlorë, Korçë dhe Durrës përkatësisht me nga 5 % të procedimeve të regjistruara, etj.
Ndërsa vërehet se numri më i ulët i procedimeve të regjistruara për këto grupvepra penale është në prokuroritë pranë gjykatës së shkallës së parë Dibër, Berat, Kukës, Elbasan dhe Lezhë ku janë regjistruar përkatësisht rreth 2 % e numrit total të procedimeve të regjistruara në shkallë vendi.

Pesha specifike që zë falsifikimi i dokumenteve në grupin e veprave penale “Falsifikimi i dokumenteve” është 59,7 % për vitin 2025, ndërkohë që në vitin 2024 ka qenë 61,3 %.

Falsifikimi i letërnjoftimeve, i pasaportave ose i vizave Pesha specifike që zë kjo vepër penale zë 24,7 %, ndërkohë që vitin 2024 është 17,9 %.

Falsifikimi i vulave, i stampave ose i formularëve zë 9,7 % për vitin 2025, ndërkohë që për vitin 2024 rezulton 13,3 %.

Në vitin 2025 nga të dhënat statistikore vërehet ulje prej 10,81 % e numrit të procedimeve të regjistruara për veprën penale të parashikuar nga neni 190 i Kodit Penal “Falsifikimi i vulave, i stampave ose i formularëve”, në krahasim me vitin 2024.