Makina përfundon në kanal në Lushnjë, plagosen çifti i bashkëshortëve

Një aksident i rëndë rrugor është regjistruar gjatë orëve të para të mëngjesit të ditës së sotme më 22 tetor, në rrethrrotullimin e Kolonjës, në aksin Fier–Lushnjë.

Një automjet fuoristradë ka humbur kontrollin, ka shkatërruar barrierat mbrojtëse dhe ka rënë në kanalin poshtë urës, nga një lartësi rreth pesë metra.

Në mjet udhëtonin dy bashkëshortë, të cilët mbetën të bllokuar brenda automjetit pas përplasjes. Për nxjerrjen e tyre u desh ndërhyrja e zjarrfikësve të Lushnjës dhe ekipit mjekësor të urgjencës. Të dy të plagosurit u transportuan me urgjencë në spitalin e Lushnjës, ku morën ndihmën e nevojshme mjekësore, raporton gazetarja e Klan News Anila Sefa.

Sipas të dhënave paraprake, dyshohet se shpejtësia e lartë dhe lagështia në asfalt, si pasojë e reshjeve të dendura të shiut, kanë ndikuar në humbjen e kontrollit të automjetit. Drejtuesi nuk ka arritur të marrë kthesën në rrethrrotullim, duke përfunduar jashtë rrugës.

Policia po vijon hetimet për të përcaktuar shkaqet e plota të ngjarjes. Pavarësisht dëmeve të rënda materiale dhe plagosjes së çiftit, aksidenti fatmirësisht nuk ka shkaktuar viktima.

Rrethrrotullimi i Kolonjës njihet si një pikë problematike për sigurinë rrugore, ku edhe në të kaluarën janë shënuar aksidente me pasoja fatale.