Rritjet e çmimeve, Shtëpia e Bardhë: Është çrregullim i përkohshme në tregun e naftës

Shtëpia e Bardhë po i kundërshton shqetësimet se ripërtëritja e armiqësive me Iranin po shkakton sërish rritje të çmimeve të naftës dhe gazit.

“Mund të ketë ndërprerje të përkohshme në tregun e naftës”, tha zëdhënësja për shtyp Karoline Leavitt, por ajo vlerësoi politikat energjetike dhe veprimet e shpejta të Presidentit Donald Trump për parandalimin e rritjeve të mëdha të çmimit të naftës, për të cilat kishin paralajmëruar kaq shumë njerëz.

Çmimi mesatar kombëtar për një gallon benzinë ​​është 3,94 dollarë, sipas shoqatës AAA. Çmimi ka filluar të rritet sërish ditët e fundit, pasi dështoi marrëveshja e armëpushimit midis SHBA-së dhe Iranit. Një vit më parë, çmimi mesatar për një gallon benzinë ​​ishte 3,16 dollarë, sipas AAA.

Leavitt theksoi masat e administratës për të nxjerrë naftë nga Rezerva Strategjike e Naftës, përjashtimin nga zbatimi i Aktit Jones dhe përdorimin e Aktit të Prodhimit për Mbrojtjen Kombëtare për prodhimin e naftës në Kaliforni- duke i cilësuar të gjitha këto përpjekje si faktorë që çuan në “një treg nafte mjaft të qëndrueshëm”.

Prioriteti i Trump, shtoi ajo, ishte të sigurohej që Irani “të mos mund të pajiset kurrë me armë bërthamore”.

Megjithatë, amerikanët po vënë në dyshim strategjinë e administratës. Një sondazh i ri i “Washington Post-Ipsos”, i publikuar të enjten, tregoi se 33% e amerikanëve e miratojnë mënyrën se si Trump po e menaxhon ekonominë, ndërsa vetëm 29% miratojnë mënyrën se si ai po e trajton luftën me Iranin.