SDT hapi hetim ndaj Zindoviq-Kljajeviqit dhe Mijatoviqit për kontrabandë kokaine

Prokuroria Speciale e Shtetit (SDT) ka hapur hetim ndaj Filip Zindoviq-Kljajeviqit dhe Ivan Mijatoviqit, të dyshuar për kontrabandë kokaine. Ndaj të dyve është ngritur procedurë penale për krijimin e organizatës kriminale dhe trafikimin e lëndëve narkotike.

Sipas njoftimit zyrtar të SDT-së, duke vepruar pas denoncimit penal të Departamentit Special Policor, prokuroria ka urdhëruar hetimin dhe ka nisur procedimin penal kundër I. M. dhe F. Z. për veprën penale të krijimit të organizatës kriminale, si dhe për dy vepra penale të prodhimit, mbajtjes dhe vënies së paautorizuar në qarkullim të lëndëve narkotike.

Objekti i hetimit është veprimtaria e organizatës kriminale që të dyshuarit e kanë organizuar për transferimin dhe shitjen e paautorizuar të drogës me qëllim përfitimi të jashtëligjshëm. Konkretisht, bëhet fjalë për transferimin e paautorizuar për shitje të 30 kilogramëve kokainë nga Gjermania në Zvicër dhe të 25 kilogramëve kokainë nga Belgjika në Angli, në prill dhe gusht të vitit 2020 — ngarkesa që u zbuluan nga organet e zbatimit të ligjit.

SDT-ja, e drejtuar nga Vladimir Novoviqi, i ka propozuar gjykatës që ndaj Zindoviq-Kljajeviqit, i cili ndodhet në arrati, të caktohet paraburgimi dhe të lëshohet urdhër-arrest ndërkombëtar. Ndërkaq, Mijatoviqi gjendet në burgun e Spuzhit, ku po vuan dënimin e marrë me një vendim të mëparshëm gjyqësor.

Burimi: Vijesti