SHAREC: TË PËRFUNDOJNË SA MË SHUMË DETYRIME, ZGJEDHJET MUND TË NGADALËSOJNË PROCESIN

_{Foto: PE}

Mali i Zi ka më pak se katër muaj kohë për të përmbushur detyrimet në rrugën drejt Bashkimit Evropian, ndërsa zgjedhjet e vitit të ardhshëm mund të ngadalësojnë procesin, vlerëson raportuesi i Parlamentit Evropian për Malin e Zi, Marjan Sharec.

Mali i Zi deri tani ka mbyllur 18 kapituj negociues, ndërsa Qeveria synon që deri në fund të vitit 2026 të përfundojë të gjithë kapitujt e mbetur.

Sharec e konsideron këtë një objektiv ambicioz, por thekson se ende nuk ka arsye për pesimizëm.

Sipas tij, sa më shumë detyrime të përmbushen gjatë këtij viti, aq më mirë, pasi vitin e ardhshëm zgjedhjet dhe fushata parazgjedhore mund ta ngadalësojnë procesin e integrimit evropian.

Sharec thekson se skepticizmi i tij nuk lidhet me mungesën e angazhimit të Malit të Zi, por me faktin se procesi varet edhe nga faktorë dhe procedura jashtë kontrollit të Qeverisë.

Ai vlerëson pozitivisht angazhimin e institucioneve, por edhe të opozitës, veçanërisht për miratimin e ligjeve dhe ndryshimet e paralajmëruara kushtetuese.

Raportuesi i Parlamentit Evropian nënvizon se përveç miratimit të ligjeve, vendimtare do të jetë edhe zbatimi i tyre në praktikë, veçanërisht në luftën kundër krimit dhe korrupsionit.

Mali i Zi tani ka më pak se katër muaj për të dëshmuar se sa mund të përparojë në përmbushjen e reformave dhe të objektivit të Qeverisë për mbylljen e të gjithë kapitujve negociues deri në fund të vitit 2026.