SHBA – Bessent: Presioni ekonomik ndaj Iranit po jep rezultate

UASHINGTON, 27 shtator /ATSH-AFP/ – Sekretari amerikan i Thesarit, Scott Bessent, tha të shtunën se përpjekjet e Shteteve të Bashkuara të Amerikës për të izoluar ekonomikisht Iranin po japin rezultate, duke iu referuar masave të reja ndaj sektorëve bankar dhe ajror iranian.

Bessent tha se, me udhëzimin e tij, ekipe amerikane ishin dërguar në vende të ndryshme për të kërkuar masa ndaj Iranit.

Sipas tij, këto përpjekje “po japin rezultate”.

Ai përmendi si shembuj Turqinë dhe Omanin, të cilat kanë ndaluar fluturimet hyrëse të kompanisë ajrore private iraniane “Mahan Air”, si dhe Emiratet e Bashkuara Arabe, të cilat kanë ndaluar fluturimet e kompanive ajrore iraniane.

Bessent përmendi gjithashtu masat ndaj sektorit bankar.

Banka Qendrore e Emirateve të Bashkuara Arabe ka bllokuar transaksionet me degët e “Bank Melli Iran”, ndërsa Turqia javën e kaluar i hoqi licencsën “Bank Mellat”, një bankë iraniane që prej vitesh është subjekt i sanksioneve perëndimore.

Sipas raportimeve të cituara nga Bessent, Departamenti amerikan i Thesarit ka zhvilluar diskutime me më shumë se 50 vende, në kuadër të përpjekjeve për të rritur presionin ekonomik ndaj Teheranit.

Masat janë pjesë e operacionit amerikan të quajtur “Operacioni Izolimi Ekonomik”, të nisur në gusht për të kufizuar lidhjet financiare dhe ekonomike të Iranit me pjesën tjetër të botës.

Megjithatë, jo të gjitha vendet po ndjekin të njëjtën linjë me Uashingtonin.

Kina, një partner i rëndësishëm ekonomik i Iranit, vazhdon të ketë lidhje me Teheranin dhe disa kompani ajrore iraniane, vijojnë të operojnë, veçanërisht në drejtim të Kinës. /