SHBA lehtëson sanksionet, do të lejojnë Venezuelën të paguajë avokatin e Maduros

Shtetet e Bashkuara kanë rënë dakord të modifikojnë sanksionet e tyre ndaj Venezuelës për t'i lejuar qeverisë së vendit të Amerikës së Jugut të paguajë

Shtetet e Bashkuara kanë rënë dakord të modifikojnë sanksionet e tyre ndaj Venezuelës për t’i lejuar qeverisë së vendit të Amerikës së Jugut të paguajë avokatin mbrojtës të ishpresidentit Nicolas Maduro-s.

Maduro dhe gruaja e tij Cilia Flores u kapën nga shtëpia e tyre në Karakas nga forcat speciale amerikane më 3 janar dhe u dërguan në Nju Jork për t’u përballur me akuza penale, përfshirë konspiracion për narkoterrorizëm. Ata janë deklaruar të pafajshëm dhe janë burgosur në Bruklin në pritje të gjyqit.

Avokati i Maduros, Barry Pollack, në shkurt i kërkoi gjykatësit të distriktit amerikan me seli në Manhattan, Alvin Hellerstein, ta pushonte çështjen sepse sanksionet e SHBA-së po e pengonin qeverinë venezueliane të paguante shpenzimet e tij ligjore.

Pollack tha se ndalimi përbënte shkelje të të drejtave të Maduros sipas Kushtetutës së SHBA-së ndaj avokatit të zgjedhur prej tij. As Maduro dhe as Flores nuk mund të përballojnë vetë avokatët dhe qeveria venezueliane është e përgatitur të paguajë tarifat e tyre, kanë thënë avokatët e tyre.

Të gjithë të pandehurit penalë në SHBA kanë të drejta kushtetuese pavarësisht nëse janë shtetas amerikanë apo jo. Hellerstein tha në një seancë gjyqësore më 26 mars se nuk kishte ndërmend ta pushonte çështjen, por u duk skeptik se qeveria ishte e justifikuar në bllokimin e pagesave.

Prokurori Kyle Wirshba tha në gjykatë se sanksionet e SHBA-së që bllokojnë pagesat bazoheshin në interesa legjitime të sigurisë kombëtare dhe politikës së jashtme. Wirshba tha gjithashtu se Hellerstein nuk mund t’i urdhëronte Departamentit të Thesarit të modifikonte sanksionet e tij sepse dega ekzekutive, jo gjyqësori, është përgjegjëse për politikën e jashtme.

Hellerstein vuri në dukje se SHBA-të kishin lehtësuar sanksionet ndaj Venezuelës që nga rrëzimi i Maduros. Marrëdhëniet midis Karakasit dhe Uashingtonit janë përmirësuar që kur Delcy Rodriguez, ish-nënpresidentja e Maduros, filloi të drejtonte Venezuelën në mënyrë të përkohshme.

Gjatë mandatit të tij të parë në Shtëpinë e Bardhë, Presidenti i SHBA-së Donald Trump shtrëngoi sanksionet ndaj Venezuelës për shkak të akuzave se qeveria e Maduros ishte e korruptuar dhe minonte institucionet demokratike. Uashingtoni e quajti rizgjedhjen e Maduros në vitin 2018 mashtruese.

Maduro i hodhi poshtë këto akuza, së bashku me pretendimet për pjesëmarrjen e tij në trafikun e drogës, si justifikime për atë që ai e quajti një dëshirë të SHBA-së për të marrë kontrollin e rezervave të mëdha të naftës të vendit të OPEC-ut të Amerikës së Jugut.