SHBA – Obama:: Nëse do të isha kandidat për president IA do të ishte prioriteti im

NJU JORK, 14 shtator /ATSH – ANSA/ – Ish-presidenti i Shteteve të Bashkuara, Barack Obama, u ka bërë thirrje demokratëve që t’i japin përparësi hartimit të një plani të qartë për inteligjencën artificiale (IA), duke theksuar nevojën për të trajtuar si rreziqet, ashtu edhe mundësitë që sjell teknologjia e re.

Duke folur në një aktivitet për mbledhjen e fondeve të zhvilluar ditët e fundit, Obama tha se, nëse do të ishte kandidat për president vitin e ardhshëm, IA do të ishte një nga pikat kryesore të programit të tij.

“Do të kisha një plan të qartë dhe do të flisja për të, duke thënë: ky është plani ynë për sigurinë, kështu do t’i garantojmë fëmijët tanë”, u shpreh Obama, sipas NBC.

Ai tha se do të vlerësonte konkretisht edhe pasojat ekonomike të zhvillimit të IA-së, veçanërisht ndikimin e saj në humbjen e vendeve të punës.

Obama e cilësoi inteligjencën artificiale si potencialisht të rrezikshme, por theksoi se, nëse menaxhohet siç duhet, ajo mund të sjellë përfitime të mëdha.

“Është një fushë që po zhvillohet shumë shpejt në duar private dhe, nëse nuk marrim kontrollin mbi të, besoj se mund të bëhet e rrezikshme. Nëse arrijmë ta menaxhojmë siç duhet, mendoj se mund të sjellë përfitime”, tha ai.

Sipas Obamës, IA mund të ndihmojë në përshpejtimin e trajtimit të shumë sëmundjeve dhe zhvillimin e energjive të pastra.

“Nuk duam t’i mbyllim këto mundësi, por duhet të kuptojmë se bëhet fjalë për një mjet”, theksoi ish-presidenti amerikan.

Sipas raportimeve, Obama e ka cilësuar si “zhvillim inkurajues” edhe thirrjen e drejtuesit të Anthropic, Dario Amodei, për ngadalësimin e zhvillimit të inteligjencës artificiale.