SHBA vendosi sanksione ndaj Iranit, Kina kërkon të shmanget çdo masë që mund të rrisë tensionet

Kina ka paralajmëruar të hënën se sanksionet dhe presioni ekonomik nuk janë mënyra për të zgjidhur mosmarrëveshjet, ndërsa Shtetet e Bashkuara përgatiten të vendosin një paketë të gjerë sanksionesh ndaj Iranit dhe partnerëve të tij tregtarë.

Zëdhënësi i Ministrisë së Jashtme kineze, Lin Jian, deklaroi në Pekin se masat e presionit vetëm sa çojnë në përshkallëzim të tensioneve.

“Përshkallëzimi nuk i shërben interesave të askujt”, tha Lin, duke u bërë thirrje palëve të tregojnë përmbajtje dhe të shmangin çdo masë që mund të rrisë më tej tensionet apo të dëmtojë ekonominë globale dhe stabilitetin financiar.

Deklaratat e Pekinit vijnë ndërsa administrata e Presidentit Donald Trump po përgatitet të vendosë sanksione ndaj Teheranit dhe partnerëve të tij tregtarë, në kushtet e konfliktit të vazhdueshëm mes SHBA-së dhe Iranit.

Teherani i ka dënuar sanksionet amerikane si “terrorizëm ekonomik”, duke argumentuar se ato janë të destinuara të dështojnë.

Kina u ka bërë thirrje palëve të përfshira në konflikt që të rikthehen sa më shpejt në rrugën e dialogut dhe negociatave për të gjetur një zgjidhje politike.