Shërbimi i Ndërlidhjes kremton 95-vjetorin, Nufi: Komponent strategjik i sigurisë kombëtare

Komanda Kibernetike e Ndërlidhjes, pjesë e Forcave të Armatosura të Shqipërisë, ka kremtuar 95-vjetorin e krijimit të Shërbimit të Ndërlidhjes.

Në ceremoninë e organizuar me këtë rast morën pjesë Ministri i Mbrojtjes Ermal Nufi, Shefi i Shtabit të Përgjithshëm të FARSH, gjenerallejtënant Arben Kingji, si dhe gjeneralë, oficerë, nënoficerë, punonjës civilë, ushtarë, veteranë të Shërbimit të Ndërlidhjes etj.

Në fjalën e tij përshëndetëse, Ministri Nufi theksoi se, Shërbimi i Ndërlidhjes është një komponent shumë i rëndësishëm dhe i pazëvendësueshëm i Forcave të Armatosura, pa të cilin asnjë operacion nuk mund të realizohet, pasi siguron komunikimin.

Ai shprehu mirënjohje për të gjithë brezat që kanë shërbyer në këtë strukturë, duke vlerësuar veçanërisht kontributin e veteranëve dhe efektivëve aktualë që vijojnë të garantojnë funksionimin e sistemeve të komunikimit dhe mbrojtjes kibernetike.

Më tej, Ministri Nufi u shpreh se Shqipëria, si vend anëtar i NATO-s, ka rritur ndjeshëm kapacitetet e ndërlidhjes dhe mbrojtjes kibernetike, duke mundësuar ndërveprimin e plotë me sistemet e Aleancës.

“Si vend anëtar i NATO-s, Shqipëria ka një përgjegjësi të qartë dhe ambicie të mëdha. Sot, sistemet tona të ndërlidhjes janë të ndërveprueshme me ato të Aleancës, duke iu mundësuar komunikim të sigurt dhe të besueshëm në çdo operacion të përbashkët. Ky është rezultat i profesionalizmit tuaj, por edhe i investimeve të vazhdueshme në modernizimin e teknologjive dhe zhvillimeve njerëzore. Në këtë rrugëtim, shprehim mirënjohjen tonë për partneritetin tonë strategjik me Shtetet e Bashkuara të Amerikës, si edhe për të gjithë aleatët dhe partnerët që kanë mbështetur zhvillimin e kapaciteteve tona. Falë këtij bashkëpunimi, kemi rritur standardet e trajnimit, kemi modernizuar infrastrukturën dhe kemi ndërtuar kapacitete, që sot janë plotësisht të integruara në arkitekturën e sigurisë së Aleancës”, u shpreh Ministri Nufi.

Ai theksoi se modernizimi i Forcave të Armatosura mbetet prioritet i qeverisë shqiptare, duke përfshirë investime në teknologji, infrastrukturë kritike dhe zhvillim profesional të personelit.