Shiste lëndë narkotike në zona turistike, arrestohet 36-vjeçari në Vlorë

Policia e Vlorë ka arrestuar këtë të martë një 36-vjeçar, pasi u kap duke shitur lëndë narkotike në Dhërmi. Sipas raportimeve nga policia, në pranga ka

Policia e Vlorë ka arrestuar këtë të martë një 36-vjeçar, pasi u kap duke shitur lëndë narkotike në Dhërmi.

Sipas raportimeve nga policia, në pranga ka rënë shtetasi E. P., 36 vjeç, i cili në automjetin me të cilin lëvizte, tip “Volkswagen”, iu gjetën lëndë narkotike Cannabis Sativa, e gatshme për shitje.

“Specialistët për Hetimin e Narkotikëve të DVP Vlorë, në vijim të kontrolleve të shtuara për goditjen e veprimtarive kriminale në fushën e narkotikëve, bazuar dhe në informacionet e siguruara në rrugë operative, kanë goditur një rast të shitjes së lëndëve narkotike në fshatin Dhërmi.

Për këtë rast u arrestua shtetasi E. P., 36 vjeç, banues në Lushnjë.

Shërbimet e Policisë kanë ndaluar në fshatin Dhërmi, automjetin tip “Volkswagen”, me drejtues shtetasin E. P. Gjatë kontrollit fizik ndaj tij dhe kontrollit në automjet, u gjet sasi lënde e dyshuar narkotike Cannabis Sativa, e gatshme për shitje.

Në vijim, gjatë kontrollit në ambientin ku banonte ky shtetas, në fshatin Drimadhë, u gjetën rreth 450 gramë lëndë e dyshuar narkotike Cannabis Sativa dhe një sasi lënde e dyshuar narkotike Kokainë, të ndara në doza, gati për shitje.

Lënda narkotike u sekuestrua në cilësinë e provës materiale, bashkë me automjetin dhe celularin e këtij shtetasi”, thuhet në njoftimin e policisë.

Materialet procedurale iu referuan Prokurorisë së Vlorës, për veprime të mëtejshme, për veprën penale “Prodhimi dhe shitja e narkotikëve”.