Shkatërrohet depoja me furnizime mjekësore e OBSH-së në Ukrainë pas sulmeve gjatë natës

Një depo humanitare e Organizatës Botërore të Shëndetësisë që mbante furnizime mjekësore me vlerë rreth 500,000 dollarë është shkatërruar, ndërkohë që Kievi dhe Moska kanë shkëmbyer sulme me raketa gjatë fundjavës.

Sipas zyrës evropiane të OBSH-së, kolapsi i ndërtesës erdhi pasi ishte goditur dy herë në më pak se 24 orë.

Sipas, Drejtorit Rajonal të OBSH-së për Evropën Hans Henri P. Kluge, furnizimet ishin të mjaftueshme për të ofruar ndihmë për rreth 225,000 njerëz.

“Gjithçka u shkatërrua”, tha Kluge në një postim në LinkedIn . “Për fat të mirë, nuk u raportuan viktima”, shtoi ai.

Vendndodhja u godit për herë të parë më 3 gusht, duke e shtyrë OBSH-në të fillonte zhvendosjen e furnizimeve diku tjetër. Një anëtar i stafit të OBSH-së dhe disa shoferë sapo ishin larguar nga vendi më 7 gusht kur u godit përsëri, duke shkatërruar drejtpërdrejt furnizimet e OBSH-së. Orë më vonë, një sulm i tretë shkatërroi ndërtesën.

Që nga pushtimi në shkallë të plotë i Ukrainës nga Rusia më 24 shkurt 2022, ka pasur 3,149 sulme ndaj kujdesit shëndetësor dhe 240 vdekje, sipas të dhënave të OBSH-së . Portali i mbikëqyrjes globale të OBSH-së regjistron 72 sulme ndaj depove dhe 646 incidente në të cilat janë prekur furnizimet mjekësore.

Drejtori i Përgjithshëm i OBSH-së, Tedros Adhanom Ghebreyesus, gjithashtu dënoi shkatërrimin e depos nëpërmjet një postimi në X.

“Nuk mund ta them mjaftueshëm me zë të lartë: sulmet ndaj kujdesit shëndetësor DUHET TË NDALOJNË. Përndryshe, njerëzit privohen nga kujdesi shëndetësor jetëshpëtues”, tha ai në postim .