Shpërthim në një minierë në Kinë, 90 persona humbin jetën! Vijon operacioni i shpëtimit

90 persona kanë humbur jetën nga një shpërthim gazi në një minierë qymyri në provincën Shanxi të Kinës veriore, raportoi të shtunën media shtetërore CCTV.

Shpërthimi i gazit ndodhi vonë të premten në minierën e qymyrit Liushenyu në qarkun Qinyuan, me 247 punëtorë në detyrë nën tokë.

Presidenti kinez Xi Jinping u bëri thirrje autoriteteve të mos kursejnë asnjë përpjekje për të trajtuar të plagosurit dhe për të kryer operacione kërkim-shpëtimi, ndërsa urdhëroi një hetim të plotë për shkakun e aksidentit.

Operacionet e shpëtimit po vazhdojnë dhe shkaku i aksidentit ende nuk dihet, sipas autoritetit lokal të menaxhimit të emergjencave në Qinyuan.

Kina ka ulur ndjeshëm vdekjet në minierat e qymyrit – shpesh të shkaktuara nga shpërthimet e gazit ose përmbytjet – që nga fillimi i viteve 2000 përmes rregulloreve më të rrepta dhe praktikave më të sigurta.