Shpërthimi i Ebolës në Kongo kalon 3500 raste

Shpërthimi i virusit Ebola në Republikën Demokratike të Kongos ka kaluar 3.500 raste të konfirmuara, duke u bërë shpërthimi i dytë më i madh në botë për nga numri i infeksioneve të regjistruara.

Sipas autoriteteve shëndetësore, që nga shpallja e epidemisë në mesin e muajit maj janë konfirmuar 3.532 raste, duke tejkaluar shpërthimin e viteve 2018–2020 në vend, kur u regjistruan rreth 3.470 raste.

Ministria e Shëndetësisë bëri të ditur se deri më tani 1.556 persona kanë humbur jetën nga virusi, ndërsa shkalla e vdekshmërisë ka arritur në 44,1%. Aktualisht, 807 pacientë ndodhen në izolim ose po trajtohen në spital, ndërsa 626 të tjerë janë shëruar.

Sipas Organizatës Botërore të Shëndetësisë, vetëm epidemia e Afrikës Perëndimore gjatë viteve 2014–2016, që preku Guinenë, Liberinë dhe Sierra Leonen, ka regjistruar më shumë raste, me 28.616 të infektuar dhe 11.310 viktima.

Virusi është përhapur në pesë provinca të Republikës Demokratike të Kongos: Haut-Uele, Ituri, Kivu Verior, Kivu Jugor dhe Tshopo. Provinca Ituri mbetet epiqendra e epidemisë, e shkaktuar nga varianti Bundibugyo i virusit Ebola.

Deri më tani nuk ekziston një vaksinë apo trajtim specifik i miratuar për variantin Bundibugyo. Megjithatë, Koalicioni për Inovacionet e Gatishmërisë Epidemike (CEPI) ka njoftuar një partneritet me Hilleman Laboratories, me seli në Singapor, për të përshpejtuar zhvillimin e një vaksine kandidate kundër këtij varianti.

Sipas CEPI-t, projekti do të mbështetet me deri në 8,5 milionë dollarë për zhvillimin dhe prodhimin e dozave të nevojshme për sprovat klinike.