Shqipëria dhe bregdeti mbeten të preferuara të trevave e diasporës edhe gjatë muajit gusht, fluks i lartë mjetesh në Mori

Shqipëria dhe bregdeti ynë vijon të mbetet i preferuar i pushuesve edhe këtë verë, kryesisht nga shqiptarët e trevave dhe Diasporës.

Edhe këtë muaj fluksi i vërshimit të tyre me mjete nga pikat kufitare ka qenë i lartë.

Dita e sotme (8 gusht) ka pasur një numër të madh mjetesh me itinerar nga Kosova për t’iu drejtuar Shqipërisë, duke sjellë edhe fluks mjaft të lartë lëvizjeje në pikën kufitare të Morinës.

Ka pasur edhe varg të gjatë mjetesh gjatë “Rrugës së Kombit”, kryesisht segmenti që lidh doganën e Morinës me kabinën e pagesës, ku qarkullimi është dendësuar ndjeshëm.

Për të përballuar fluksin e madh të udhëtarëve dhe për të parandaluar krijimin e radhëve të gjata, në pikën kufitare po punohet me të gjitha sportelet në dispozicion.

Informohet nga autoritetet policore se masa të ngjashme menaxhimi janë ndërmarrë edhe te Pika e Pagesës së Rrugës së Kombit, me qëllim lehtësimin e kalimit dhe shmangien e vonesave.

Autoritetet parashikojnë se ky fluks i lartë automjetesh do të vijojë gjatë gjithë fundjavës, meqenëse me mijëra qytetarë nga Kosova kanë zgjedhur bregdetin shqiptar për të kaluar pushimet e tyre verore.