Shqipëria e përmendur si destinacion i rekomanduar për 2026

Shtypi i huaj po e rendit Shqipërinë ndër destinacionet më tërheqëse për vitin 2026; më së fundi këtë e thekson gazeta izraelite Jerusalem Post, e cila nxjerr në pah kombinimin e pasurisë kulturore, plazheve dhe zonave malore që ofron vendi.

Raporton TV Klan se artikulli i Jerusalem Post vë theksin te vendndodhja mes Ballkanit dhe Greqisë dhe përmend se Shqipëria ofron histori të pasura, qytete bregdetare me rërë të bardhë, mundësi për udhëtime në male dhe një sërë atraksionesh të tjera natyrore dhe historike.

Vitet e fundit, turistët janë rritur në mënyrë të ndjeshme, pjesërisht për shkak të çmimeve më të përballueshme dhe si alternativë ndaj destinacioneve evropiane të mbipopulluara si Italia, Greqia, Spanja dhe Portugalia. Kryeqyteti Tirana shfaq një transformim të shpejtë, nga një periudhë e izoluar komuniste në një qendër ballkanike me jetë kulturore e artistike në rritje.

Riviera shqiptare përmendet për vijën e saj bregdetare të bukur, plazhet me rërë dhe guralecë dhe mundësitë për udhëtime me varkë drejt limaneve të fshehura. Ndër vendet rekomanduara janë Kështjella e Porto Palermos e shekullit të 19-të dhe parku arkeologjik i Butrintit, i njohur nga UNESCO, që tërheq vizitorë të interesuar për histori dhe kulturë.

Për adhuruesit e natyrës artikulli nxjerr në pah Alpet Shqiptare — Luginën e Valbonës, Luginën e Thethit dhe peizazhet e egra të zonës, si dhe atraksionin e njohur “Syri Blu” të Thethit, sipas TV Klan.