Shqipëria U-18, humbet ndaj Malit të Zi

Shqipëria e moshës deri në 18 vjeç e ka humbur miqësoren e dytë me Malin e Zi, 0-3, ndeshje e cila është luajtur të enjten në mesditë në kompleksin e Federatës së Futbollit malazez në Podgoricë. Badnjar në të 33’ e më pas Vraçar në të 53’ dhe 79’ kanë vulosur suksesin e vendësve.

Në këtë miqësore të dytë, trajneri i kuqezinjve Ardi Behari në formacion ka aktivizuar Totoshi, Zylyf Muça, Nuredini, Kurti, Buzi, Meta, Beluli, Syla, Kasmollari, Dukagjini dhe Tafili. Gjatë pjesës së dytë kanë luajtur të gjithë lojtarët e stolit rezervë, të cilët janë produkt i ekipeve të moshave U-15, U-16 dhe U-17. Ajo që duhet theksuar është fakti se të gjitha këto futbollistë të kombëtares së moshës deri në 18 vjeç vitin e ardhshëm do të jenë baza e kombëtares U-19 në eleminatoret e Kampionatit Europian 2023. Dy ditë më parë, Shqipëria kishte fituar në Shkodër, 2-0 po me Malin e Zi.