Superliga e Kosovës do të sjellë një risi të rëndësishme në Gjilan për sezonin 2026/27. Stadiumi me bari sintetik do të jetë për herë të parë arenë e ndeshjeve të elitës së futbollit kosovar nën ndriçimin e reflektorëve, duke krijuar një atmosferë krejtësisht të re për futbollistët dhe tifozët.

Punimet për vendosjen e reflektorëve tashmë kanë nisur, ndërsa pas përfundimit të tyre ndeshjet do të mund të zhvillohen edhe në oraret e mbrëmjes. Ky investim pritet të përmirësojë kushtet për organizimin e takimeve të Superligës dhe t’i japë një dimension të ri atmosferës futbollistike në qytetin e Gjilanit, shkruan RadioStar.

Ndriçimi i stadiumit me bari sintetik konsiderohet një hap i rëndësishëm për zhvillimin e infrastrukturës sportive në qytet, duke mundësuar organizimin e ndeshjeve në standarde më të larta dhe duke u ofruar tifozëve një përvojë më atraktive gjatë sezonit të ri të Superligës së Kosovës.