Struga e Bledi Shkëmbit shkëlqen: 4-0 ndaj Skopjes dhe kreu i renditjes

Struga Trim Lum, e drejtuar nga trajneri Bledi Shkëmbi, e mundi bindshëm 4-0 Skopjen në ndeshjen e xhiros së 11-të të Ligës së Parë të Maqedonisë së Veriut, siç njofton Gol.mk.

Vendasit e zgjidhën ndeshjen herët: Besmir Bojku e hapi rezultatin në minutën e 11-të me një goditje spektakolare nga distanca, pasi një përpjekje e tij e parë e kishte pritur portieri Naumovski, ndërsa gjashtë minuta më vonë Hristijan Maleski e çoi rezultatin në 2-0 pas një tollovie në zonë. Në minutën e 30-të, Agamah shënoi me kokë të tretin, pas krosimit të Voshës.

Në fillim të pjesës së dytë, në minutën e 59-të, Vosha u shkëput nga mbrojtësit pas një topi në thellësi dhe e vendosi topin në rrjetë për rezultatin përfundimtar 4-0. Skopja, debutuese në elitë, deri në fund nuk arriti as golin e nderit.

Me këto tri pikë, Struga arrin kuotën e 23 pikëve dhe barazohet në krye të renditjes me Shkëndijen e Tetovës, ndërsa Skopja mbetet e fundit me vetëm 3 pikë, si ekipi i vetëm ende pa asnjë fitore në kampionat.