Temperaturat rekord në Vlorë, plazhi i Zvërnecit mbushet me pushues

Temperaturat e larta, që këtë të martë në Vlorë kanë arritur deri në 40 gradë Celsius, kanë sjellë një fluks të madh pushuesish në bregdet.

Mijëra qytetarë vendas dhe turistë të huaj kanë zgjedhur plazhet e Vlorës për t’iu shmangur vapës ekstreme, ndërsa një nga zonat më të frekuentuara ka qenë plazhi i Zvërnecit.

Që në orët e para të paradites, bregdeti është mbushur me familje, të rinj dhe fëmijë, të cilët kanë zgjedhur të kalojnë ditën pranë detit. Fëmijët luajnë në rërën e artë, ndërsa pushuesit freskohen në ujërat e detit për t’i bërë ballë temperaturave të larta.

Pavarësisht vapës së fortë, atmosfera në plazhin e Zvërnecit vijon të mbetet e gjallë, duke konfirmuar edhe një herë se bregdeti i Vlorës mbetet një nga destinacionet më të preferuara gjatë sezonit turistik, si për pushuesit vendas ashtu edhe për turistët e huaj.