Tension në rrugët e New York-ut, Harry Styles përplaset me një fans

Harry Styles është përfshirë në një moment të tensionuar në rrugët e New York-ut, pasi një person që kërkonte autograf tentoi vazhdimisht t’i tërhiqte vëmendjen dhe e ndoqi teksa këngëtari përpiqej të vazhdonte rrugën e tij.

Sipas pamjeve të publikuara nga mediat amerikane, këngëtari ishte veshur me një bluzë me kapuç dhe një kapele bejsbolli, ndërsa dëgjonte muzikë me kufje. Në fillim, ai nuk reagoi ndaj personit që i afrohej vazhdimisht dhe përpiqej të fitonte vëmendjen e tij.

Situata duket se u tensionua më tej, pasi të dy u përfshinë në një shkëmbim fjalësh dhe gjestesh. Në një moment, një person i tretë ndërhyri mes tyre, në përpjekje për të qetësuar situatën.

Megjithatë, edhe kur Styles tentoi të largohej, personi vazhdoi ta ndiqte për disa çaste.

Pas publikimit të pamjeve, personi i identifikuar si Giovanni, i cili përdor emrin @gtvreality në Instagram, reagoi përmes rrjeteve sociale, duke marrë përgjegjësinë për incidentin.

Ai sqaroi se, sipas tij, Harry Styles kishte ruajtur qetësinë gjatë gjithë situatës dhe se ishte vetë ai që kishte humbur kontrollin.

Giovanni gjithashtu kërkoi falje publikisht, duke e përshkruar këngëtarin si një person të sjellshëm dhe duke theksuar se ai e kishte trajtuar gjithmonë me respekt që nga takimi i tyre i parë, në vitin 2012.

Kështu, pavarësisht pamjeve që fillimisht krijuan përshtypjen e një përplasjeje mes këngëtarit dhe fansit, ky i fundit pranoi se reagimi i tij kishte qenë i tepruar.

Këngëtari është parë shpesh në New York gjatë muajve të fundit, ku po zhvillon një seri koncertesh në Madison Square Garden, në kuadër të turneut të tij “Together, Together”.