Tensione në Kuvend, opozita bllokon foltoren. Këlliçi: Mbështesim protestën studentore, të dorëhiqet qeveria Rama

Seanca e sotme plenare ka nisur me tensione, teksa opozita ka bllokuar foltoren e Kuvendit pas miratimit nga kryeparlamentari Niko Peleshi të procesverbalit të seancës plenare të datës 8 tetor 2026.

Deputeti i Partisë Demokratike, Belind Këlliçi, është shprehur kundër miratimit të procesverbalit, duke e lidhur qëndrimin e opozitës me protestën e studentëve dhe zhvillimet e ditëve të fundit në vend.

Gjatë fjalës së tij, Këlliçi deklaroi se Shqipëria po përjeton ditën e dhjetë të asaj që ai e cilësoi si lëvizjen më të fuqishme studentore të 35 viteve të fundit.

“Mbaj qëndrim zyrtar për të gjithë deputetët dhe qytetarët. Kjo është dita e dhjetë që Shqipëria po përjeton lëvizjen më të fuqishme studentore të 35 viteve të fundit. Kjo është përgjigjja e një brezi që refuzon korrupsionin dhe kapjen totale të shtetit nga pushteti absolut i Ramës”, u shpreh Këlliçi.

Deputeti demokrat e cilësoi protestën si një revoltë kundër një modeli qeverisës që, sipas tij, u ka vjedhur të rinjve shpresën dhe po e largon Shqipërinë nga e ardhmja evropiane.

Ai theksoi gjithashtu se Grupi Parlamentar i Partisë Demokratike do të qëndrojë në krah të studentëve dhe qytetarëve që protestojnë për dinjitet, drejtësi dhe një Shqipëri më të mirë. Këlliçi dënoi atë që e cilësoi si dhunë shtazarake ndaj studentëve.

Ende nuk ka komente. Bëhuni i pari që komenton.