Tërheqja e forcave ruse nga Khersoni, dështim apo kurth?

Një zyrtar i instaluar nga Rusia në Ukrainën jugore tha të enjten se Moska ka gjasa të tërheqë trupat e saj nga bregu perëndimor i lumit Dnipro-s, duke sinjalizuar një tërheqje të madhe, që nëse konfirmohet, do të ishte një pikë kthese e madhe në luftë.

Megjithatë, zyrtarët ukrainas dhe analistët perëndimorë qëndruan të kujdesshëm në lidhje me shenjat se Rusia po braktiste zonën dhe pati heshtje nga zyrtarët e lartë në Moskë mbi atë që do të përbënte një nga tërheqjet më poshtëruese të Rusisë deri më tani, raporton Reuters, përcjell Telegrafi.

Kievi tha se ishte ende duke luftuar në zonë dhe ishte i kujdesshëm derisa dyshon se Moska mund të vendos një kurth duke pretenduar një tërheqje.

“Me shumë gjasa njësitë tona, ushtarët tanë, do të nisen për në bregun e majtë (lindor)”, tha Kirill Stremousov, zëvendës administratori civil i instaluar nga Rusia në rajonin Kherson, në një intervistë me Solovyov Live, një media online pro-Kremlinit. .

Zona përfshin qytetin Kherson, kryeqytetin e rajonit me të njëjtin emër, dhe i vetmi qytet i madh që Rusia ka kapur të paprekur që nga pushtimi i saj në shkurt. Ai përfshin gjithashtu njërën anë të një dige të madhe përtej Dnipro-s, e cila kontrollon furnizimin me ujë për të ujitur Krimenë, gadishullin që Rusia e ka pushtuar që nga viti 2014.

Më parë, Rusia kishte mohuar me forcë se forcat e saj po planifikonin të tërhiqeshin nga zona, një nga pushtimet e reja më të rëndësishme që Presidenti Vladimir Putin pretendoi se e kishte aneksuar në fund të shtatorit.

Spekulimet u përhapën të enjten në atë se Rusia po tërhiqej me të vërtet, pasi fotot qarkulluan në internet që tregonin ndërtesën kryesore administrative në qytetin Kherson derisa ishte hequr flamuri i Rusisë. Ukraina tha se këto imazhe mund të jenë dezinformata ruse.

Natalia Humeniuk, zëdhënëse e komandës ushtarake jugore të Ukrainës, tha se mund të jetë një kurth rus.

“Ky mund të jetë një manifestim i një provokimi të veçantë, për të krijuar përshtypjen se vendbanimet janë të braktisura, se është e sigurt të hysh në to, ndërkohë që ata po përgatiten për beteja në rrugë”, tha ajo në komentet televizive.

“Ne vazhdojmë të luftojmë, edhe në drejtimin Kherson, pavarësisht se armiku po përpiqet të na bindë se po largohen nga vendbanimet dhe po krijojnë efektin e një evakuimi total”, tha ajo.