Teuta dhe Partizani, pika që nuk ndryshon asgjë

Partizani është përballur të enjten në Stadiumin “Niko Dovana” të Durrësit me Teutën, në takimin që u luajt në mbrëmje dhe që ishte i vlefshëm për javën e parë të Kategorisë Superiore, por ishte shtyrë deri më tani. Në fakt, pjesa e parë ka folur për skuadrën vendase, teksa Peposhi bllokohet në goditjen drejt portës në minutën e 7-të, Daci gjen portierin e Partizanit, Qirko, të gatshëm një minutë më vonë pas një goditjeje të lirë, ashtu sikundër bllokohet nga mbrojtja e të kuqve edhe në të 13-ën.

Megjithatë, përpjekjet e durrsakëve do të shpërblehen në minutën e 24-t, kur Peposhi godet befas drejt portës së Qirkos, duke e gjetur të papërgatitur gardianin e të kuqve dhe do ta kalojë Teutën në epërsi. Do të duhet të kalojë gjysmë ore lojë që Partizani të shfaqet, por pa rezultat, në portën e Demës, ndërsa çerekora e mbetur e pjesës së parë do të vijojë të shohë Teutën të rrezikshme, teksa Qirko në minutën e 35-të, me një pritje të bukur dhe shtylla e djathtë pingule e portës së të kuqve dy minuta më vonë do t’i mohojnë Dacit mundësinë për të dyfishuar shifrat për Teutën, ashtu sikundër do të ndodhë edhe me Karabecin në të 43-tën.

Mbyllet kështu me epërsinë minimale të vendasve pjesa e parë në Durrës, ndërsa e dyta nis në të njëjtën mënyrë dhe Daci ndalet sërish nga Qirko në 10 minutat e para, teksa Partizani nis të reagojë. Dhe pasi ka provuar me një goditje të lirë në minutën e 72-të, 3 minuta më pas është Albers Keko, që luajti ndeshjen e tij të parë si titullar, ai që korrigjon shënjestrën dhe nuk e ka të vështirë të shënojë brenda zonës, pas një pasimi të mirë të Hadrojit.

Çerekora e fundit e kohës së rregullt dhe 4 minutat shtesë kanë parë një lojë të hapur të të dyja skuadrave, që e kanë kërkuar fitoren dhe rastet i kanë patur, por nuk ka më gol dhe Teuta e Partizani ndajnë nga një pikë në këtë barazim 1-1, që nuk ndryshon asgjë në renditje.