Thaçi konfirmon takimin me Vuçiqin në Shtëpinë e Bardhë, kërkon të raportojë në Kuvend

Presidenti i Kosovës Hashim Thaçi ka njoftuar se ka takuar në Shtëpinë e Bardhë presidentin e Serbisë Aleksandar Vuçiq me ftesë të emisarit special për dialogun, Richard Grenell, ku i pranishëm ishte edhe Këshilltari për Siguri Kombëtare, Robert O’Brien.

Nëpërmjet një shkrimi në Facebook, Thaçi tha se kërkon që menjëherë të raportojë në Kuvend lidhur me takimin e sotëm.

” Kosova është e bekuar me mbështetjen e Amerikës dhe Presidentit Trump”, thotë Thaçi.

Shkrimi i plotë i Thaçit në Facebook:

Sapo përfundova një takim të përbashkët me Presidentin e Serbisë, Aleksandër Vuçiq, në Shtëpinë e Bardhë, me ftesë të emisarit special për dialogun ndërmjet Kosovës dhe Serbisë, Richard Grenell, ku i pranishëm ishte edhe Këshilltari për Siguri Kombëtare, Robert O’Brien.

Kosova është e bekuar me mbështetjen e Amerikës dhe Presidentit Trump.

Tani jam rrugës për në Kosovë. Pres që menjëherë, të mërkurën apo të enjten, të më mundësohet raportimi në Kuvendin e Republikës së Kosovës, për t’i njoftuar deputetët dhe qytetarët e Kosovës për takimet në Uashington dhe më specifikisht për takimin e sotëm.

Duke qëndruar të bashkuara institucionet, partitë politike dhe qytetarët, Kosova do të jetë edhe më e fortë.

SHBA është shpresa dhe besimi ynë. Jemi mirënjohës përjetë! HTH