Thesari amerikan paralajmëron institucionet financiare të huaja: biznesi me Iranin sjell sanksione pa paralajmërim

Departamenti amerikan i Thesarit paralajmëroi të hënën institucionet financiare të huaja që vazhdojnë të bëjnë biznes me Iranin ose sektorin e tij financiar se mund të sanksionohen nga Uashingtoni pa asnjë njoftim paraprak, raporton Reuters, siç përcillet nga Al Jazeera.

“Institucionet financiare të huaja që vazhdojnë të kryejnë transaksione me institucione financiare iraniane të sanksionuara mund të vihen në shënjestër në çdo kohë pa njoftim paraprak dhe duhet të ndërmarrin veprime të menjëhershme për t’i ndërprerë këto aktivitete dhe marrëdhënie”, thuhet në deklaratën e Thesarit.

Sipas deklaratës, këto institucione mund të përballen gjithashtu me masa ndëshkuese civile dhe penale, nëse transaksionet e lidhura me Iranin bëjnë që institucione financiare amerikane apo persona amerikanë të shkelin sanksionet.

Paralajmërimi është pjesë e fushatës së ashpërsuar të presionit ekonomik të administratës Trump ndaj Teheranit. Sekretari i Thesarit, Scott Bessent, njoftoi në gusht operacionin “Economic Outcast”, një përpjekje për të kufizuar më tej aksesin e Iranit në tregjet globale dhe për ta detyruar regjimin të bjerë dakord për një marrëveshje që i jep fund luftës.