Tirana, trajneri Klafuriç para derbit: Shpresoj ta fitoj këtë sfidë

Tirana bëhet gati për derbin me Partizanin, të dielën në “Air Albania” duke nisur nga ora 18:30 dhe që do të vijë për shikuesit në ekranin e RTSH. Në prag të kësaj sfide, trajneri i bardhebluve, Klafuriç ka treguar fillimisht nëse pushimi për shkak të ndeshjeve të Kombëtares i ka shërbyer apo jo skuadrës që ai drejton.

“Kishte disa avantazhe dhe disavantazhe pauza e kombëtares, por më tepër do të veçoja anët pozitive. Ne e kemi përgatitur çdo gjë shumë mirë, për mua është shumë e rëndësishme që lojtarët janë gati dhe për këtë jam i lumtur”.

Debutues në derbi, por a e di tekniku bardheblu rëndësinë e kësaj sfide, ja se cfarë thotë ai!

“Unë e dija këtë që prej fillimit dhe për mua është një nder i madh të jem pjesë e një derbi në Shqipëri! Unë kam qenë pjesë e derbit të Kroacisë dhe po ndodh edhe tani, kam qenë gjithashtu pjesë e disa derbeve në botë si ajo në angli dhe në derbin e Varshavës, kështu që unë ndihem i nderuar qe jam tani në krye të Tiranës”.

Klafuriç ka treguar edhe gjendjen e skuadrës përpara kësaj përballje.

“Ne jemi gati, jemi të gjithë në kondicionin e duhur, përveç Verës i cili mungon prej disa kohësh. Janë rikthyer edhe lojtarë të tjerë! Përveç pjesës taktike kemi shtuar edhe stërvitjen në palestër me programe te dedikuata fitnesi për të rikuperuar futbollistët e për të qenë gati për derbin e së dielës”.

Dy skuadrat e kryeqytetit, që i ndan vetëm një pikë nga njëra tjetra, mbi cilën qëndron presioni? Ja çfarë thotë Klafuriç.

“Në futboll kjo është normale, une kam gjithë jetën në futboll dhe më pëlqen ky lloj presioni përpara derbit, kjo është gjë e mirë dhe na mban të karikuar, une i uroj suksese trajnerit të Partizanit por shpresoj që ta fitoj këtë sfidë.

Në derbi nuk ka favoritë, derbi është derbi, nuk ka rëndësi renditja në klasifikim, e rëndësishme është të futesh në fushë dhe të japësh më të mirën. Ne duhet të tregojmë kulaitetin tonë dhe kjo është më e rëndësishmja”.

Ende nuk ka komente. Bëhuni i pari që komenton.