Transporti i mallrave, operatorët : Ka nisur rikuperimi, 2014 viti më i keqi

Për shoqëritë që operojnë në tregun e transportit të mallrave, kryesisht në rrugë tokësore e detare viti 2014 konsiderohet si një nga më të vështirët, ku volumi ra me afërsisht 30-40%. Shkak kryesor sipas drejtuesve të këtyre kompanive ishte rënie e çmimeve të transportit, por edhe shtimi i konkurrencës.

Por, duket se më e keqja ka kaluar, pasi ecuria e transportit të mallrave të paktën deri në fund të muajit tetor ka qenë pozitive edhe pse rritja ka qenë me ritme të ulëta që mund të llogariten deri në 5%. Një nga problemet kryesore që shoqëritë që operojnë në këtë treg nënvizojnë ka të bëjë me faktin se shteti po favorizon kompantitë e huaja, si ato maqedonaqe apo edhe malazeze ( kryesisht në ato që njihen si transporti me mushama), të cilave nuk iu ushtrohen kontrolle të detajuara, madje lejohen të që kalojnë kufirin pa shumë burokraci dhe me dokumentacion jo të plotë. Sipas tyre një gjë e tillë reflektohet direkt në çmimin e shërbimit. Përfaqësues të kompanive kryesore që operojnë në transportin e mallrave si tokësor, ashtu detar thonë se aksioni kundër informalitetit duhet të shtrihet edhe në këtë sektor, pasi niveli i tij është i lartë dhe kjo gjë dëmton konkurrencën e ndershme. Dhe si përgjigje për të mbijetuar, thonë ata, zgjidhet ulja e ndjeshme e marzhit të fitimit. Por, në kushtet kur çmimet e trasportit janë në nivelet më të ulëta historike ( 350- 400 dollarë për kontenierë 20t), kjo nënkupton aktivitet në kushtet e mbijetesës.

Sipas tyre transporti detar i mallrave gjatë periudhës janar–tetor 2015 ka pasur një ecuri më të mirë, veçanërisht me destinacion Kinën dhe deri diku (edhe pse jo në të njëjtat nivele) me Spanjën.

Sa i përket transportit tokësor brenda vitit rënie e çmimeve në bursë e minerareve ka dhënë ndikim të ndjeshëm në uljen e sasive të transportuar. Megjithatë gjatë tetorit, sipas shoqërive është vënë re një farë përmirësimi. Transporti drejt Kosovës vlerësohet si me ecurinë më të mirë kryesisht për mallra industrialë.