Trump njofton marrëveshjen “historike” për çarmatimin e Hamasit

Presidenti i SHBA-së, Donald Trump, ka njoftuar arritjen e një marrëveshjeje që ai e cilësoi “historike” për çarmatimin e plotë të Hamasit dhe grupeve të tjera të armatosura në Rripin e Gazës.

Përmes një postimi në rrjetin e tij social “Truth Social”, Trump deklaroi se marrëveshja përbën një “hap monumental drejt paqes dhe sigurisë së qëndrueshme”.

“Sot, Bordi i Paqes arriti një marrëveshje HISTORIKE për ÇARMATIMIN E PLOTË të Hamasit dhe të gjitha grupeve të tjera të armatosura në Gaza. Ky është një hap monumental drejt PAQES dhe SIGURISË së qëndrueshme”, shkroi Trump.

Deri më tani, Hamasi nuk ka konfirmuar zyrtarisht marrëveshjen, ndërsa Lëvizja Palestineze e Xhihadit Islamik ka deklaruar se raportimet për një marrëveshje të tillë janë të pasakta.

Sipas zyrtarëve të përfshirë në proces, grupet e armatosura në Gaza pritet t’ia dorëzojnë armët një komiteti të posaçëm, ku fillimisht do të dorëzohen armët e policisë dhe më pas ato personale.

Çarmatimi i Hamasit konsiderohet një element kyç i planit shumëfazësh të paqes të administratës Trump për përfundimin e luftës në Gaza dhe krijimin e një strukture të re qeverisëse në territor.

Një zyrtar i Bordit të Paqes tha se nëse marrëveshja zbatohet, autoriteti kalimtar do të marrë kontrollin e Gazës dhe Hamasi do të largohet nga roli qeverisës.

“Për herë të parë, Hamasi zyrtarisht është zotuar për një plan të zbatueshëm për heqjen dorë nga të gjitha armët e tij, i cili do të pasohet nga tërheqja e Izraelit nga Gaza”, deklaroi Bordi i Paqes.

Sipas planit të paraqitur nga Trump, Gaza do të qeveriset nga një “qeveri e re palestineze” që do të bashkëpunojë me Bordin e Paqes, ndërsa siguria do të garantohet nga një Forcë Ndërkombëtare Stabilizimi në koordinim me një forcë të re policore palestineze.

Presidenti amerikan tha se procesi do të zhvillohet në faza dhe se tërheqja e forcave izraelite do të bëhet paralelisht me çarmatimin e grupeve të armatosura.

SHBA-ja deklaroi se ka koordinuar çdo hap me Izraelin, ndërsa zyrtarët amerikanë pranuan se në Tel Aviv ekziston ende skepticizëm për zbatimin e plotë të angazhimeve nga ana e Hamasit.

Trump falënderoi ndërmjetësit nga Egjipti, Katari dhe Turqia për rolin e tyre në negociata, duke theksuar se objektivi është që Gaza të mos përdoret më si bazë për sulme ndaj Izraelit.

Zyrtarët amerikanë paralajmëruan se zbatimi i marrëveshjes do të kërkojë kohë dhe se kalimi nga një fazë në tjetrën do të bëhet vetëm pas verifikimit të përmbushjes së detyrimeve të përcaktuara.