U arrestua Mladen Shushkavçeviq, kreu i sindikatës së Drejtorisë së Policisë — aksioni godet kryesindikalistët e sektorit të sigurisë
Arrestimi i kryetarit të Sindikatës së Policisë pason prangat për tre kryesindikalistë të tjerë të sigurisë; aksioni, sipas Vijesti-t, nisi para dy vjetësh
Kryetari i Sindikatës së Drejtorisë së Policisë (UP), Mladen Shushkavçeviq, u arrestua mbrëmë, siç njofton Vijesti, në vijim të aksionit të gjerë që synon parregullsitë në punën e organizatave sindikale të sektorit të sigurisë në Mal të Zi.
Arrestimi i tij vjen pasi prangat iu vendosën më herët kryetarit të Sindikatës së Agjencisë për Siguri Kombëtare (ANB), Dragoljub Milloviqit, ish-kryetarit të organizatës sindikale të Akademisë së Policisë, Zharko Mrdoviqit, dhe ish-kryetarit të Organizatës Sindikale të Ministrisë së Punëve të Brendshme (MPB), Danilo Radunoviqit, shkruajnë mediet malazeze.
Sipas të dhënave të Vijesti-t, të katër sindikalistët e arrestuar janë ende pjesë e Sindikatës së Institucioneve të Sigurisë, ndërsa aksioni në kuadër të të cilit u vunë prangat katër drejtuesve sindikalistë ka nisur para dy vjetësh.
Nga Drejtoria e Policisë nuk ka ende asnjë reagim zyrtar lidhur me arrestimet e kryesindikalistëve, shkruan Vijesti. Detaje të reja priten në orët në vijim.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.