UNS proteston: Të ndalen diskriminimi dhe pengimi i gazetarëve në Serbi

Shoqata e Gazetarëve të Serbisë (UNS) protestoi sot për rastet e reja të pengimit të punës dhe të diskriminimit të gazetarëve dhe u bëri thirrje të gjithë aktorëve të jetës publike që gazetarëve dhe punonjësve të medias t’u mundësojnë punë të papenguar, siç njofton gazeta Danas, e cila e përcolli deklaratën e UNS-së.

Sipas UNS-së, kryeredaktorja e portalit Webinfo nga Beçeji i Ri, Tijana Jankoviç, dhe kolegia e saj Kristina Demeter Filipçev nga “Bečejski mozaik” nuk u lejuan dje të raportonin nga tribuna ku u prezantuan lehtësitë për pensionistët, të organizuar nga Fondi Republikan i Sigurimit Pensional dhe Invalidor (Fondi PIO) në Beçej. Në tribunë mori pjesë edhe ministrja e Minierave dhe Energjisë, Dubravka Gjedoviç Handanoviç.

“Për ngjarjen morëm ftesë nga Fondi PIO. U paraqitëm rregullisht se do të merrnim pjesë dhe na u përgjigjën ‘shihemi’ në ngjarje. Por kur arritëm atje, personi i ngarkuar për informim na tha se hyrja për mediat megjithatë nuk lejohet dhe se nuk mund të raportojmë”, tha Jankoviç për UNS-në, duke shtuar se këtë ua konfirmuan më pas edhe përfaqësuesit e ministrisë. Ajo ngriti edhe çështjen e fushatës së funksionarëve, e ndaluar me ligj, duke vënë në dukje deklaratën e ministres se “duan që edhe pas 25 tetorit të vazhdojnë politikën e Aleksandër Vuçiçit”.

UNS-ja njofton edhe se kryeredaktorit të portalit “Mašina”, Marko Miletiç, të dielën nuk iu lejua të raportonte nga tubimi i Partisë Progresive Serbe (SNS) në Surçin. Miletiç tha për UNS-në se arriti të xhironte disa pamje, pas çka mbështetës të SNS-së iu afruan dhe i thanë të largohej e të mos xhironte; kur iu afrua stendave të SNS-së për të pyetur se kush do të fliste në tubim, e dëbuan duke i thënë se nuk ishte i mirëpritur.

Në deklaratë, UNS-ja thekson se është e domosdoshme që gazetarët të mund të raportojnë pa pengesa për të gjitha temat dhe ngjarjet me interes publik, veçanërisht gjatë fushatës zgjedhore, kur qytetarët kanë të drejtë të informohen për aktivitetet e të gjithë aktorëve politikë. Shoqata kujton se Ligji për Informimin Publik dhe Mediat ndalon diskriminimin e drejtpërdrejtë dhe të tërthortë të redaktorëve, gazetarëve dhe personave të tjerë në fushën e informimit publik, dhe se liria e informimit nuk guxon të cenohet përmes keqpërdorimit të pozitës zyrtare dhe të autorizimeve publike, siç përcjell Danas.