Vatikani paralajmëron grupin katolik se rrezikon përjashtimin

Vatikani i kërkoi të mërkurën një grupi katolik i dedikuar meshës së vjetër latine, të anulojë planet për të shuguruar peshkopë të rinj pa pëlqimin e Papa Leos, duke paralajmëruar se ky veprim do të çonte në përjashtim nga Kisha me 1.4 miliardë anëtarë.

Në kërcënimin e parë të njohur të dënimit më të rëndë të Kishës gjatë papatit të Leos, zyra doktrinare e Vatikanit i tha Shoqërisë së Shën Piut X me seli në Zvicër se çdo shugurim i peshkopëve do të krijonte një një prishje formale me papën.

“Ceremonia e planifikuar e shugurimit do të shënonte një ofendim të rëndë kundër Zotit dhe do të sillte shkishërimin e vendosur nga Kisha”, tha në një deklaratë Kardinali Victor Fernandez, kreu i zyrës.

Shoqëria e Shën Piut X është një grup ultra-tradicionalist që mohon mësimet kryesore të Koncilit të Dytë të Vatikanit, një takim historik i peshkopëve në Vatikan në vitet 1960 që ndoqi një sërë reformash për Kishën globale.

Këshilli lejoi gjithashtu që Mesha, e cila deri atëherë thuhej vetëm në latinisht, të kremtohej në gjuhët lokale. Shoqëria e hodhi poshtë këtë ndryshim, duke përmendur dëshirën për ndjenjën e misterit dhe formalitetit të ritit latin.

Personat e përjashtuar nga kisha konsiderohen plotësisht të ndarë nga Kisha. Ata nuk janë në gjendje të marrin sakramentet ose të mbajnë detyra në Kishë derisa të pendohen. Nëse vdesin ndërsa janë përjashtuar, nuk janë në gjendje të varrosen në mënyrë katolike.

Shoqëria e Shën Piut X, e cila thotë se numëron 733 priftërinj në të gjithë botën, ka pasur marrëdhënie të tensionuara me Vatikanin për dekada të tëra.

Themeluesi i saj i ndjerë, Kryepeshkopi Marcel Lefebvre, u shkishërua në vitin 1988 pasi shuguroi katër peshkopë pa lejen e Papa Gjon Pali II të atëhershëm.

Benedikti XVI, pasardhësi i Gjon Palit, kërkoi të rinovonte dialogun me shoqërinë dhe hoqi katër përjashtime të mbetura.

Udhëheqja aktuale njoftoi në shkurt se planifikonte të shuguronte peshkopë të rinj, pa miratimin e Vatikanit, në korrik, duke përmendur nevojën për më shumë prelatë për të udhëhequr shoqërinë.

Është një mësim i rreptë i Kishës që vetëm Papa mund të autorizojë shenjtërimin e peshkopëve të rinj, me qëllim që të ruhen lidhjet e Kishës me 12 apostujt e Jezusit, të cilët konsiderohen priftërinjtë dhe peshkopët e parë.

Shenjtërimi pa pëlqimin papal sjell përjashtim automatik si për personin që shenjtërohet ashtu edhe për peshkopin që drejton ceremoninë.