Vengu: KQZ të forcojë transparencën dhe kontrollin mbi financimin e partive politike

Deputeti Pirro Vengu prezantoi në Kuvend rekomandimet për Komisionin Qendror të Zgjedhjeve (KQZ), gjatë seancës plenare të dedikuar shqyrtimit të veprimtarisë së institucioneve kushtetuese dhe të pavarura për vitin 2025.

Në fjalën e tij, Vengu theksoi se forcimi i besimit të qytetarëve te proceset zgjedhore kërkon përmirësimin e punës së KQZ-së dhe rritjen e transparencës në administrimin e zgjedhjeve.

Sipas tij, Kuvendi rekomandon që KQZ të rrisë bashkëpunimin me strukturat përgjegjëse të Kuvendit, të përfshijë teknologjinë e informacionit si prioritet në Planin Strategjik 2026–2031, si dhe të forcojë transparencën dhe kontrollin efektiv të financimit të fushatave zgjedhore përmes përditësimit të sistemit elektronik financiar.

Vengu gjithashtu kërkoi që KQZ të hartojë dhe t’i paraqesë Kuvendit një raport të posaçëm mbi auditimin e financave të partive politike dhe fushatave zgjedhore, duke e cilësuar këtë një hap të rëndësishëm për rritjen e besueshmërisë dhe integritetit të procesit zgjedhor.