Vesna Medenica dërgohet në Urgjencën e KCCG-së pasi u rrëzua gjatë shëtitjes në burgun e Spuzhit

Ish-kryetarja e Gjykatës Supreme të Malit të Zi, Vesna Medenica, është dërguar në Bllokun Urgjent të Qendrës Klinike të Malit të Zi (KCCG), pasi u rrëzua gjatë shëtitjes në oborrin e Burgut Hetues në Spuzh, ku sipas informacioneve jozyrtare të gazetës Pobjeda ka pësuar lëndim në kokë.

Ngjarjen e ka konfirmuar për Pobjedën avokati i Medenicës, Zdravko Begović, i cili tha se klientja e tij ka pësuar një aksident në Burgun Hetues dhe se mjekët do të përcaktojnë pas ekzaminimit nëse lëndimet janë të lehta apo të rënda.

Siç raportojnë Vijesti dhe Dan, Medenica ndodhet në paraburgim pasi Gjykata e Lartë e Podgoricës, në shkallë të parë, e dënoi me dhjetë vjet burg. Ajo u shpall fajtore në dy raste të ndikimit të paligjshëm, ndërsa u lirua nga akuza për formimin e organizatës kriminale.

Paraburgimi ndaj saj u caktua më 28 shkurt, pasi u pranua ankesa e Prokurorisë Speciale të Shtetit për rrezikun e arratisjes.