VIDEO / Aeroporti i Vlorës dhe investimi në Zvërnec, Balla replikon në Parlamentin Europian

Gjatë një fjalimi në Parlamentin Europian, Kryetari i Grupit Parlamentar të Partisë Socialiste, Taulant Balla, ka mbrojtur investimet në Zvërnec dhe në Aeroportin e Vlorës, duke hedhur poshtë pretendimet për dëmtim mjedisor.

Balla theksoi se debati rreth aeroportit nuk lidhet me ekologjinë, por me konkurrencën, duke kujtuar se në atë zonë ka pasur një infrastrukturë të ngjashme që në kohën e italianëve.

Ai bëri me dije se 21.7% e territorit të Shqipërisë është zonë e mbrojtur dhe siguroi se projektet e reja synojnë zhvillimin e një turizmi të qëndrueshëm që krijon vende pune, pa cenuar mjedisin.

Sipas tij, për investimin e përfolur ende nuk ka një leje të dhënë dhe çdo hap do t’i nënshtrohet një vlerësimi rigoroz të ndikimit në mjedis dhe transparencës me komunitetin. Balla ftoi eurodeputetët për një mision faktmbledhës në terren dhe e cilësoi kritikën e ngritur si pjesë të një fushate dezinformimi.

“Neve na nevojitet një aeroport në jug. Shpresojmë që vitin që vjen të kemi mundësi të fluturojmë nga Vlora në Strasburg. Do ju ftoja të vinit të realizonit një mision faktmbledhës të gjithë bashkë, jo për të marrë like, por për të parë si është situata në terren. Në vitin 2014 ne prezantuam moratoriumin e gjuetisë për të ruajtur jetët e flamengove. 21.7% e gjithë territorit të vendit tonë është zonë e mbrojtur. Kemi 12 parqe kombëtare kategoria 2, kemi 11 peizazhe të mbrojtura. Sipërfaqja e tokës të cilën ju përmendët, është tokë private. Ajo çfarë u tha nuk ishte e saktë. Nuk ka leje të dhënë ende.

Ndikimi mjedisor do të vlerësojë ndikimet e mundshme në habitat dhe burimet ujore. Do ketë transparencë me komunitetin lokal. Qëllimi ynë është të promovojmë turizmin e qëndrueshëm, që hap vende pune. Sepse kemi nevojë për më shumë vende pune. Jemi të bindur që të thithim investime dhe do të garantojmë dhe mbrojmë të gjitha aspektet mjedisore. Lufta më e madhe për demokracinë është luftë kundër dezinformimit dhe është një luftë që duhet ta realizojmë të gjithë bashkë.”