Vllaznia kalon Kukësin dhe sheh Europën
Kategoria Superiore e Kampionatit Kombëtar të Futbollit ka luajtur të enjten pasdite 3 takimet e tjera të javës së saj të 11-të. Dhe Rrjeti i Radio-Televizionit ka sjellë drejtpërdrejt takimin Kukësi-Vllaznia, i cili ka parë shkodranët të marrin një fitore minimale, por të rëndësishme, që i ka bashkuar me dyshen kryeqytetase të kreut, duke parë kështu zonën e Europës.
Shkodranët kanë triumfuar ndaj verilindorëve me një ndeshje ku kanë krijuar më shumë lojë dhe raste, teksa ia dolën që të mbanin larg portës për pjesën më të madhe të kohës ekipin vendas. Një gol i Esin Hakajt në minutat e fundit të pjesës së parë i ka mjaftuar Vllaznisë për t’u kthyer te fitoret duke mundur Kukësin në fushën e këtij të fundit dhe duke i ngjitur tashmë shkodranët në podiumin e kampionatit.
Pjesa e dytë ka qenë e luftuar dhe të dyja skuadrat kanë luajtur hapur, me Vllazninë që ka mundësi të dyfishojë me Boshnjakun, por goditja e tij ndalet nga shtylla dhe me Kukësin që mund të barazonte shifrat me Barbozën 15 minuta para fundit, por edhe në minutën e 83-të.
Sidoqoftë, s’ka më gola deri në fund dhe Vllaznia mund Kukësin 1-0, duke u ngjitur përsëri në shkallët e sipërme të renditjes, dhe duke e zhytur edhe më poshtë Kukësin e Dobit i cili është kthyer edhe një herë në krizë rezultatesh dhe tani sheh përsëri shumë afër fundin e renditjes.
