Votimi i rezolutës në OKB, Server: Nuk besoj se do të ketë pasoja për Shqipërinë

Votimi i rezolutës në OKB nuk prodhon pasoja as për OKB-në e as për Shqipërinë. Zërat brenda politikës amerikane e shohin të pavlefshëm diskutimin se si votuan vendet per rezolutën kundër vendimit të administratës amerikane për ta njohur Jeruzalemin si kryeqytet të Izraelit.

Analisti Daniel Server, studiues në Qendrën për Marrëdhënie Transatlantike në Universitetin, “Johns Hopkins”, i tha Zërit të Amerikës, një ditë pas votimit se nuk mendon se do të ketë pasoja. “Nuk besoj se do të ketë pasoja. Mendoj se ishte një kërcënim i zbrazët. SHBA sigurojnë shumë rezultate të mira në OKB. Vetëm javën e kaluar, SHBA siguruan një rezolutë mjaft të mirë që impononte sanksione të reja kundër Koresë së Veriut. Nuk mendoj se OKB-ja do të ndëshkohet dhe as Shqipëria” tha zoti Server. “Mendoj se ishte diçka që ia ulte reputacionin administratës së Shteteve të Bashkuara duke bërë një kërcënim të tillë. Ata duhet ta kishin parashikuar se do të kishte një kundërshtim të fortë ndaj vendimit për Jeruzalemin dhe duhet ta kishin pranuar këtë” tha më tej studiuesi në Qendrën për Marrëdhënie Transatlantike në Universitetin, “Johns Hopkins” Daniel Server.
Duke e parë efektin e votimit edhe nga pikëpamja e vlerës ligjore të dokumentit ai tha se “Kjo rezolutë e Asamblesë së Përgjithshme nuk ka fuqi ligjore, pra në fakt nuk ka ndonjë peshë. Ishte gabim nga ana e amerikanëve që i vunë asaj një theks aq të madh. Nëse nuk do ta kishin bërë këtë, rezoluta do të ishte miratuar qetësisht dhe askush nuk do ta kishte vënë re” tha zoti Server.