Vuçiçi pranon debatin me Listën Studentore në RTS: “Do të humbasin në çdo debat”

Radio-televizioni publik i Serbisë (RTS) ka ftuar në debat parazgjedhor presidentin Aleksandar Vuçiç, kandidatin e parë të Listës Studentore Ilija Srdanoviç dhe drejtoreshën e organizatës CRTA. Siç njofton Nova.rs, Vuçiçi i është përgjigjur pozitivisht ftesës, por pretendon se kandidatët e studentëve “në çdo debat do të humbasin”.

Duke folur për RTS-në, Vuçiçi u shpreh: “Unë pranoj, edhe me ta edhe me të parin e listës së studentëve-bllokuesve, si të quhen. Nëse unë nuk jam në gjendje dhe nuk jam gati t’u përgjigjem pyetjeve tuaja pas kaq vitesh dhe çdo ditë 15-16 orë angazhim, atëherë nuk duhet të merrem me këtë punë.” Sipas tij, lista studentore nuk sjell fytyra të reja, por “fytyra të vjetra, të njohura mirë” që nuk kanë pasur sukses në punët e tyre.

Studentët në bllokadë i janë përgjigjur RTS-së me një letër zyrtare, ku kërkojnë që përpara çdo debati të njoftohen për temën, formatin, kohëzgjatjen dhe bashkëbiseduesit. Ata sqarojnë se profesori Ilija Srdanoviç është kandidati i parë në listën “Lista Studentore – Studentët fitojnë”, por nuk është “bartës” i listës në kuptimin që e përcakton ligji zgjedhor, dhe se debati duhet të mbledhë njerëz me njohuri e përvojë për fushën përkatëse. Sipas raportimit të Nova.rs, ata pyesin gjithashtu se në çfarë cilësie do të dalë Vuçiçi — si president i shtetit (funksioni që ende mban) apo si bartës i listës për zgjedhjet parlamentare — dhe thonë se vështirë mund të debatojnë me dikë që ka falur ata që i sulmuan studentët.

Studentët i kërkojnë RTS-së që gjatë fushatës të veprojë si shërbim i vërtetë publik: ndjekje e barabartë, e drejtë, e balancuar dhe e paanshme e të gjithë pjesëmarrësve zgjedhorë, siç e parashikojnë rregullat e vetë RTS-së.

Kjo ndodh ditën kur Vuçiçi ka paralajmëruar dorëheqjen nga presidenca — sonte rreth orës 20:00 — për të hyrë në fushatë si bartës i listës “Serbia e Bashkuar” për zgjedhjet e parakohshme parlamentare të 25 tetorit.