Wall Street lidh bonuset dhe ngritjet në detyrë me aftësitë në inteligjencën artificiale, tregon sondazhi

Në Wall Street, mënyra se si punonjësit përdorin inteligjencën artificiale po ndikon gjithnjë e më drejtpërdrejt te paga dhe përparimi në karrierë. Kështu rezulton, siç njofton Reuters, nga një sondazh i firmës së rekrutimit për shërbimet financiare Selby Jennings, sipas të cilit gati një e katërta e firmave financiare e lidhin kompensimin apo ngritjen në detyrë me zotësinë në përdorimin e kësaj teknologjie.

Sipas raportimit të Reuters, 30 për qind e firmave u kërkojnë punonjësve që në vlerësimet formale të performancës të deklarojnë përdorimin e mjeteve të inteligjencës artificiale. Ndërkohë, 42 për qind e të anketuarve thonë se kanë vendosur kritere formale për matjen e aftësive të stafit në këtë fushë.

Drejtori ekzekutiv i Selby Jennings, Dylan Gomez, i tha Reuters se kompanitë nuk mjaftohen më të kontrollojnë nëse punonjësit i përdorin mjetet e AI-së, por ndjekin edhe efektin e tyre në prodhim dhe në rezultatet e biznesit. Ai shtoi se deri vitin e ardhshëm pritet të qartësohet më shumë se sa lidhet kompensimi me përdorimin dhe performancën në inteligjencën artificiale.

Sondazhi u krye me 500 drejtues të industrisë financiare dhe gjeti gjithashtu se 30 për qind e firmave kanë krijuar ekipe ose role të posaçme për të verifikuar nëse investimet në inteligjencën artificiale po sjellin rezultate konkrete. Sipas Reuters, kjo tregon një zhvendosje më të gjerë në Wall Street drejt kthimeve të matshme nga teknologjia.