Zgjedhja e 3 anëtarëve të rinj të KLP, kryeprokurori Çela kërkon zgjidhje edhe për pagat e magjistratëve: Po kalojmë pe

Tre anëtarët e rinj të Këshillit të Lartë të Prokurorisë janë zgjedhur këtë të premte nga radhët e prokurorëve.

Antoneta Sevdari rikthehet në KLP me 165 vota, si përfaqësuese e Prokurorisë së Përgjithshme. Afërdita Ndoi u zgjodh nga radhët e prokurorive të apelit me 160 vota, ndërsa Eloida Goxhi nga prokuroritë e shkallës së parë me 148 vota.

Në mbledhje, Prokurori i Përgjithshëm, Olsian Çela, ngriti shqetësimin për mungesën e prokurorëve dhe mbingarkesën me dosje.

Olsian Çela, Prokuror i Përgjithshëm, u shpreh:

“Prokuroria po kalon një periudhë tepër të vështirë prej disa vitesh, për shkak të vakancave në organikë dhe mbingarkesës në punë.”

Një tjetër çështje e ngritur nga kryeprokurori ishte trajtimi financiar i magjistratëve.

“Për këtë nevojitet një dialog real dhe konstruktiv mes të gjitha palëve, që synon zgjidhjen e problemit dhe jo shtyrjen e tij përmes vendimmarrjeve që nuk respektojnë standardet e vendosura nga Gjykata Kushtetuese.”

Me zgjedhjen e tre anëtarëve të rinj, Këshilli i Lartë i Prokurorisë vijon punën për përmbushjen e funksioneve të tij në sistemin e prokurorisë.