Zhvillohet seanca për McGonigal/ Prokurori amerikan: Çështja do të përfshijë informacione të klasifikuara

Çështja penale kundër ish-agjentit të lartë të FBI-së, Charles McGonigal do të përfshijë informacione të klasifikuara së bashku me komunikimet elektronike, të dhëna financiare dhe fotot e survejimit.

Kështu tha një prokuror të enjten gjatë një seance gjyqësore, raporton rrjeti amerikan, ABC News.

McGonigal, i cili është deklaruar i pafajshëm për akuzat për lidhje me oligarkun rus të sanksionuar, Oleg Deripaska, u shfaq pranë avokatit të tij dhe një të bashkë-pandehuri dhe nuk tha asgjë.

Sipas ABC News, prokurorët zbuluan llojet e provave që prisnin të përdorin.

Ndërsa gjyqtari udhëzoi të dy palët të punojnë për një urdhër mbrojtës për të siguruar që asgjë e klasifikuar të mos zbulohet.

Mbrojtjes iu dhanë 90 ditë shtesë për të shqyrtuar të gjitha provat e zbuluara deri më tani.

Një avokat i të bashkëpandehurit të McGonigal, ish-diplomatit rus Sergey Shestakov, kërkoi nga qeveria që të kontrollonte dosjet e agjencive të inteligjencës për prova që mund të ishin të dobishme për mbrojtjen.