Zjarr i madh në Shkozet të Durrësit/ Flakët përfshijnë një magazinë, një pjesë e qytetit mbetet pa energji

Një zjarr ka rënë pasditen e së enjtes në një magazinë pranë mbikalimit të Shkozetit, në Durrës. Shkaqet e rënies së zjarrit nuk dihen ende, ndërsa autoritetet po punojnë për shuarjen e plotë të flakëve dhe sqarimin e rrethanave të ngjarjes.

Në vendngjarje ndodhen forca të shumta zjarrfikëse, të cilat po punojnë për shuarjen e zjarrit, ndërkohë mësohet se është lokalizuar vendi ku nisi zjarri, dhe tashmë nuk paraqet rrezik për objektet përreth.

Për shuarjen e tij po angazhohen me goditje të përqendruar mjete dhe forca të Mbrojtjes nga Zjarri dhe Shpëtimi të Durrësit, si edhe ekipet zjarrfikëse të Portit të Durrësit.

Sipas burimeve, brenda magazinës ndodhen lodra për fëmijë si edhe fishekzjarre, çka e ka bërë më të ndërlikuar ndërhyrjen.

Për shkak të situatës, policia ka devijuar qarkullimin e automjeteve në zonë, si dhe është ndërprerë prej më shumë se një ore energjia elektrike, për arsye sigurie gjatë operacionit të zjarrfikësve.