Zoff për Maldinin: Njeriu perfekt në një moment të sikletshëm, e mbështes edhe zgjedhjen e Leonardos

Dino Zoff, kampion Europe dhe bote, si dhe ish-trajner i kombëtares italiane, ka komentuar emërimin e Paolo Maldinit si drejtor teknik i të kaltërve. Ai e ka mbështetur zgjedhjen në një intervistë për “QS”:

“Është një zgjedhje që e ndaj plotësisht. Paolo i ka dhënë shumë futbollit tonë, Milanit në veçanti, por edhe kombëtares. Ka qenë gjithashtu lojtar i imi kur unë isha trajner i Italisë dhe nuk mund të harroj babanë e tij, Cesare, i cili ishte zëvendësi i Bearzot kur ngrita Kupën e Botës në vitin 1982”.

Për Leonardon si bashkëpunëtor, Zoff shtoi: “Emërimi i Maldinit është perfekt, për karizmën dhe kompetencën e tij. E mbështes edhe zgjedhjen e Leonardos, sepse është e drejtë që një lider të rrethohet nga njerëz të besuar”.

Zoff nuk dha emra për pasuesin e Gattuso në stol: “Maldini duhet të jetë i lirë të ndjekë bindjet e tij, pa ndërhyrje të jashtme”. Ai theksoi nevojën për qartësi në role dhe përgjegjësi, duke e cilësuar momentin e kombëtares si “të sikletshëm”.