“133 miliardë dollarë”, Kanadaja propozon krijimin e një banke të re për mbrojtjen e vendeve aleate

Kryeministri kanadez Mark Carney po promovon krijimin e Bankës së Mbrojtjes, Sigurisë dhe Rezistencës (DSRB), një iniciativë shumëpalëshe që synon të forcojë kapacitetet mbrojtëse të vendeve aleate përmes një fondi që mund të arrijë deri në 133 miliardë dollarë.

Kryenegociatorja kanadeze për projektin, Isabelle Hudon, deklaroi se Kanadaja synon të shpallë listën e vendeve themeluese gjatë samitit të NATO-s, megjithëse theksoi se negociatat me partnerët janë ende në zhvillim.

Sipas Hudon, grupi fillestar i vendeve pritet të përbëhet kryesisht nga shtete evropiane, përveç Kanadasë, ndërsa anëtarësimi do të mbetet i hapur edhe pas themelimit të bankës.

Qëllimi i DSRB është të sigurojë financim me kosto të ulët për investime në mbrojtje dhe siguri, në një kohë kur Otava argumenton se rendi tradicional botëror i udhëhequr nga Shtetet e Bashkuara po përballet me sfida të mëdha.

Megjithatë, e ardhmja e projektit mbetet e pasigurt pa mbështetjen e vendeve kyçe që do t’i mundësonin bankës të siguronte një vlerësim maksimal krediti (AAA), i nevojshëm për financim të favorshëm në tregjet ndërkombëtare.

Hudon bëri të ditur se janë zhvilluar bisedime me Korenë e Jugut, e cila po shqyrton mundësinë e anëtarësimit, ndërsa aktualisht asnjë vend tjetër i G7 nuk është pranë nënshkrimit të marrëveshjes.

Deri më tani, vetëm Luksemburgu ka konfirmuar publikisht pjesëmarrjen dhe pritet të shërbejë si baza evropiane e bankës. Ndërkohë, Carney ka deklaruar se ekziston një “masë kritike” shtetesh të gatshme për t’iu bashkuar nismës.

Sipas planit, kontributet financiare do të jenë proporcionale me madhësinë e ekonomisë së secilit shtet. Burime të njohura me projektin bëjnë të ditur se Kanadaja mund të kontribuojë deri në 1.5 miliardë euro, ndërsa vendet më të vogla pritet të japin nga 500 deri në 750 milionë euro.