5 kapituj në tryezë, çfarë pritet në Konferencën e 26 majit BE-Shqipëri

Konferenca e 8-të Ndërqeveritare Bashkimi Europian-Shqipëri do të mbahet më 26 maj. Burime për Klan News, bëjnë me dije se do të diskutohen 5 kapituj, mes tyre ai për gjyqësorin dhe të drejtat themelore.

“Më 26 maj në Bruksel, Konferenca Ndërqeveritare Shqipëri-BE vulos me sukses fazën hyrëse dhe çel fazën përmbyllëse të negociatave të anëtarësimit. Sepse ndryshe nga si e përflasin ditë e natë ata që gjithnjë humbasin në fund, Shqipëria Europiane që po ndërtojmë është një histori suksesi, e cila shkruhet me vizion, punë e përkushtim, hap pas hapi, e në fund gjithnjë fiton”, lajmëroi më herët kryeministri Edi Rama.

Kujtojmë se takimi paraardhës i këtij niveli u mbajt në nëntor të vitit 2025, kur u hap grup-kapitulli i fundit i negociatave me BE, “Bujqësia dhe Kohezioni”. Gjë që sipas kreut të qeverisë u arrit në një kohë rekord, për vetëm 12 muaj!

Viti që lamë pas shënoi një sërë momentesh kyçe sa i takon këtij procesi, që pikënisjen e pati në korrik të 2022-it, kur u çelën negociatat. 16 vjet pas firmosjes së marrëveshjes së Stabilizim-Asociimit, u bë realitet ëndrra e kahershme e shqiptarëve për rrugëtimin e vendit drejt Unionit.