AAK reagon pas arrestimit të Haradinajt, Qeveria të ndërpresë komunikimin me Serbinë
Aleanca për Ardhmërinë e Kosovës ka konfirmuar zyrtarisht ndalimin e kreut të saj, Ramush Haradinaj, në aeroportin ndërkombëtar Basel-Mulhouse, më saktësisht në pjesën franceze të tij.
“Kryetari i AAK-së, Ramush Haradinaj, sot është ndaluar në aeroportin e Baselit, sipas një urdhërarresti të lëshuar nga Serbia në vitin 2004”, thuhet në një komunikatë të lëshuar nga AAK.
“Një veprim i tillë është krejtësisht i padrejt dhe i papranueshëm. U bëjmë thirrje autoriteteve franceze qe t’i mundësojnë zotit Haradinaj që të vazhdojë udhëtimin e tij i papenguar dhe kërkojmë nga autoritet e Bashkimit Evropian dhe të shteteve evropiane veç e veç që të mos pengojnë lëvizjen e lirë të autoriteteve të Kosovës, sipas urdhërarresteve të paligjshme të Serbisë”, ka thënë AAK, shkruan Gazeta Express.
Partia e Haradinajt ka kërkuar nga Qeveria e Kosovës të ndërpresë çdo komunikim me Serbinë deri sa ajo të mos i tërheqë fletarrestet ndërkombëtare kundër përsonaliteve të Kosovës.
