Ahmeti porosit partitë maqedonase: Janë ditë vendimtare, pranoni kompromisin

Kryetari i Bashkimit Demokratik për Integrim, Ali Ahmeti është takuar sot në selinë e BDI-së në Tetovë me Ambasadorin Norvegjez, Arne Sannes Bjørnstad.

Ahmeti dhe Ambasadori Bjørnstad biseduan për krizën politike në Maqedoni si dhe shtjelluan alternativat për dalje nga situata e vështirë politike, njoftojnë nga kabineti i Ahmetit.

“Ahmeti e njoftoi Ambasadorin norvegjez rreth përpjekjeve intenzive të BDI-së gjatë ditëve të fundit për të arritur kompromis midis palëve në interes të shtetit. Këto ditë janë vendimtare për vendin dhe i takon tashmë partive politike maqedonase që t’i përkrahin alternativat pēr dalje nga kriza duke dëshmuar gatishmëri për përgjegjësi politike, reforma thelbësore si dhe rikthim të fuqishëm të agjendës EuroAtlantike dhe mirëmbajtjes së marrëdhënieve ndëretnike.
Të vetëdijshëm që përplasja më serioze në vend tejkalon kufijtë dhe potencialet e Maqedonisë, liderët e partive më të mëdha në vend duhet ta arrijnë kompromisin menjëherë.
Kryetari Ahmeti ritheksoi që BDI do ti vijojë përpjekjet për të dalë nga kriza duke mbetur në kontakt të përditshëm me partnerët ndërkombëtar nga Brukseli dhe Washingtoni, por edhe në komunikim me partitë nënshkruese të Marrëveshjes së Shkupit”, njoftojnë nga kabineti i Ahmetit.