Airbus thyen rekordin e fluturimit më të gjatë në botë: A350 qëndroi në ajër për mbi 24 orë

Më 27 korrik 2026, Airbus shënoi një moment historik në aviacionin civil me avionin e tij më të ri, A350-1000 ULR, i cili qëndroi në fluturim për më shumë se 24 orë pa ndalesa. Ky fluturim rekord u realizua gjatë një prove nga Melbourne në Toulouse, duke mbuluar një distancë prej rreth 17,000 kilometrash.

Avioni, i ndërtuar posaçërisht për kompaninë australiane Qantas Airways, është në fazën përfundimtare të testimeve para dorëzimit dhe do të përdoret për fluturimet ultra të gjata Sydney-Londër dhe më pas Sydney-New York, të cilat pritet të zgjasin midis 20 dhe 22 orësh.

Fluturimi nisi në orën 17:27 lokale dhe përfundoi në Toulouse pas 24 orësh e 24 minutash, duke thyer rekordin e mëparshëm të fluturimit më të gjatë të të njëjtit model, si dhe rekordin e vitit 2005 të një Boeing 777-200ULR që fluturoi për 22 orë e 35 minuta.

Ky test u realizua me një ekuipazh të reduktuar dhe ngarkesë minimale për të optimizuar konsumin e karburantit, ndërsa A350-1000 ULR është i pajisur me një rezervuar qendror shtesë për kerozinë që i mundëson fluturime të tilla të gjata.

Me këtë model, Qantas synon të realizojë lidhje direkte dhe pa ndalesa midis Australisë dhe qendrave kryesore ekonomike të botës, duke tejkaluar kufizimet gjeografike dhe duke hapur një epokë të re të fluturimeve ultra të gjata.