Aksion në veri të Kosovës, plagosen policë shqiptarë, dhjetëra të arrestuar

Edhe pse shifrat janë të pakonfirmuara, flitet për gati 30 persona të prangosur, mes të cilëve ka shqiptarë, serbë e boshnjakë. Pavarësisht këtij fakti, megjithatë, episodi ka ngjallur zemëratën e banorëve serbë të 4 komunave veriore me shumicë serbe, për të cilat shtypi në Beograd pretendon se janë vënë qëllimisht në shënjestër.

Policia e Kosovës e sqaroi se të ndaluarit janë të dyshuar për përfshirje në disa vepra penale, si “pjesëmarrje ose organizim i grupit kriminal”, “kontrabandim me mallra”, “keqpërdorim i pozitës zyrtare”, “dhënie e ryshfetit”, “tregti e ndaluar”, e të tjera.

Ajo u bëri thirrje qytetarëve të mos bien prè e provokimeve. Operacioni policor po vazhdon pavarësisht rezistencës së armatosur në veri të Mitrovicës.

Kryeministri Ramush Haradinaj sqaroi përmes një postimi në Facebook se, në mesin e personave të ndaluar ka zyrtarë doganorë, policë, por edhe qytetarë të thjeshtë. “Si kryeministër i vendit konfirmoj se bëhet fjalë për zbatim të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin”, është shprehur ai.

Ndërkohë, drejtori i Zyrës për Kosovën në Qeverinë e Serbisë, Marko Gjuriç citohet të ketë thënë se, nëse ndërkombëtarët nuk e ndalojnë atë që po ndodh në veri të Kosovës, Beogradi do të kundërpërgjigjet, ndërsa presidenti Aleksandar Vuçiç ka urdhëruar ushtrinë dhe policinë të vihen në gjendje gatishmërie.